Məhkəməyə müraciət

Fərdi əmək mübahisələri, işəgötürənlə işçi arasında əmək müqaviləsinin, kollektiv müqavilənin və s. şərtlərinin tətbiqi zamanı yaranan fikir ayrılığıdır. Tərəflər Azərbaycan Respublikasının Əmək Məcəlləsinin 288-ci maddəsində qeyd edilən aşağıdakı məsələlərlə bağlı hüquqlarının pozulduğunu aşkar etdikdə, fərdi əmək mübahisələrini həll edən orqanlara Əmək Məcəlləsinin tələblərinə riayət etməklə müraciət edərək pozulmuş hüquqlarının bərpa edilməsini tələb edə bilər:

- Əmək müqaviləsinin bağlanması, ləğv edilməsi və ya onun şərtlərinin dəyişdirilməsi;

- Əmək normalarının, həmçinin işçinin əmək funksiyasının həcminin müəyyən edilməsi;

- Əmək müqaviləsində nəzərdə tutulan iş yerinin dəyişdirilməsi;

- Əmək şəraitinin şərtlərinin dəyişdirilməsi;

- Əmək haqqının, habelə digər ödəmələrin müəyyən edilməsi və hesablanması, yaxud ödənilməsi;

- Əmək haqqından, habelə digər ödəmələrdən tutulmaların aparılması;

- Məzuniyyət hüququnun həyata keçirilməsi;

- İntizam tənbehinin verilməsi;

- Əməyin mühafizəsinin təşkili və təmin edilməsi;

- İşçinin işəgötürənə vurduğu maddi və ya mənəvi ziyanın məbləğinin müəyyən edilməsi və ödənilməsi;

- İşəgötürənin işçiyə vurduğu maddi və ya mənəvi ziyanın məbləğinin müəyyən edilməsi və ödənilməsi;

- İşçilərin və ya iş yerlərinin attestasiyası komissiyasının qərarının qanunauyğunluğu və ya əsaslılığının müəyyən edilməsi;

- Müsabiqə komissiyasının qərarının qanuni, obyektiv və ədalətli olub-olmamasının araşdırılması;

- İstehsalat qəzası və ya peşə xəstəliyi nəticəsində işçiyə və ya onun ailə üzvlərinə vurulan ziyana görə əvəzin məbləğinin müəyyən edilməsi və ödənilməsi;

- Səhmlər və ya digər qiymətli kağızlar üzrə ödəmələrin məbləğlərinin müəyyən edilməsi və ödənilməsi, habelə özəlləşdirmə prosesində və sonralar əmək münasibətləri ilə bağlı normaların tətbiq edilməsi;

- Əmək müqaviləsinin, habelə kollektiv müqavilənin şərtlərinin və əmək qanunvericiliyinin pozulması ilə bağlı digər məsələlərin tətbiq edilməsi.

İşçinin hüquqlarını və qanuni mənafelərini pozmuş işəgötürən fərdi əmək mübahisəsinin həlli nəticəsində məhkəmə tərəfindən müəyyən edilmiş işçiyə dəyən maddi ziyanı tam məbləğdə ödəməlidir.

• Hər hansı sualınız yaranarsa, telefon nömrəmiz və ya onlayn çat vasitəsilə bizimlə əlaqə saxlaya bilərsiniz.