Korporativ xidmətlər

Biznesinizi şirkət yaradaraq idarə etmək, şirkətin fəaliyyətini əlavə investorlar vasitəsi ilə genişləndirmək, açıq bazara çıxmaqla minlərlə insanı cəlb etməklə uzunmüddətli kapital cəlb etmə imkanınızın olması üçün Açıq Səhmdar Cəmiyyəti (ASC) formasında şirkət yaratmağınız tövsiyə olunur.

ASC elə bir hüquqi şəxsdir ki, onun iştirakçıları onlara mənsub səhmləri digər səhmdarların razılığı olmadan özgəninkiləşdirə bilər. Səhmdar cəmiyyətlərinin digər hüquqi şəxslərdən əsas fərqi ondan ibarətdir ki, səhmdar cəmiyyətinin nizamnamə kapitalı müəyyən nominal dəyərə malik səhmlərdən (adi və ya imtiyazlı səhmlər) ibarət olur. Bu cür səhmdar cəmiyyəti buraxdığı səhmlərə açıq abunə yazılışını və onların sərbəst satışını həyata keçirə bilər.

Açıq səhmdar cəmiyyətinin qeydiyyatının xüsusiyyətləri ondan ibarətdir ki, şirkətin qeydiyyatı zamanı öncə təsisçilərin (səhmdarların) malik olması nəzərdə tutulan səhmlərin nominal dəyəri, səhmlərin sayı və ümumi məbləği müəyyən edilməli, habelə səhmlərin buraxılışı barədə səhmdarların qərarı qəbul olunmalı, səhmlərin emissiya prospekti və ya informasiya memorandumu tərtib və təsdiq edilməli, daha sonra emissiya prospekti açıqlanmalı, səhmlərin buraxılışı dövlət qeydiyyatına alınmalı və səhmlərin yerləşdirilməsi həyata keçirilməlidir.

Səhmlərin yerləşdirilməsi dedikdə, emitentin (şirkətin) səhmlərini onların ilk mülkiyyətçilərinin əldə etməsi başa düşülür. Səhmlərin yerləşdirilməsi kütləvi təklif və ya qapalı yerləşdirmə üsulu ilə həyata keçirilir. Səhmlərin kütləvi təklifi - onların qeyri-müəyyən sayda şəxsə, yaxud kütləvi informasiya vasitələri ilə və ya 50 nəfərdən artıq şəxsə təklif edilməsidir. Səhmlərin qapalı yerləşdirilməsi - onları 50 nəfərdən az şəxsə təklif etməklə və ya səhmlərin buraxılışı haqqında qərarda səhmləri əldə edəcək investorları göstərməklə keçirilən yerləşdirmədir. Səhmlərin kütləvi təklifi fond birjası vasitəsilə həyata keçirilir, yəni səhmlər fond birjası vasitəsilə investorlara təklif edilir. Bu zaman səhmlərə abunə yazılışı həyata keçirilməlidir.

Səhmlərin kütləvi təklifi və ya yerləşdirilməsi başa çatdıqdan sonra emitent və ya səhmləri təklif edən şəxs maliyyə bazarlarına nəzarət orqanına səhmlərin emissiyasının və ya kütləvi təklifinin yekunları haqqında hesabatı təqdim etməlidir və hesabat təsdiq edilməlidir.

Xidmət haqqına biznesin qeydiyyata alınması üçün zəruri olan notarial etibarnamə və ərizələr, ASAN imza və ya elektron imzanın alınması (ASAN imza sertifikatı ödənişsiz verilir, lakin mobil nömrə alınmalıdır), hüquqi şəxslərin qeydiyyatı, bank hesabının açılması üçün rüsumlar, investisiya şirkəti ilə bağlı ödənişlər və digər rəsmi xərclər daxil deyildir.

Hər hansı sualınız yaranarsa, bizimlə əlaqə saxlaya bilərsiniz.