Digər xidmətlər

Mediasiya - mediatorun (mediatorların) vasitəçiliyi ilə tərəflər arasında yaranmış mübahisənin qarşılıqlı razılıq əsasında həlli ilə bağlı prosesdir. Mediasiya tərəflər arasında münaqişə səviyyəsinin azaldılması və onları razı salacaq şəkildə mübahisənin həllini təmin etmək məqsədini daşıyır.

Mediasiya mülki işlər, kommersiya mübahisələri, ailə, əmək və inzibati hüquq münasibətlərindən irəli gələn mübahisələrə tətbiq oluna bilər. Ancaq kommersiya mübahisələri, həmçinin ailə və əmək münasibətlərindən irəli gələn mübahisələr üzrə məhkəməyə müraciət etməmişdən əvvəl ilkin mediasiya sessiyasında iştirak mütləqdir. İlkin mediasiya sessiyasında iştirak etmədən bu növ mübahisələrlə bağlı məhkəməyə müraciət etmək mümkün deyildir.

Mediasiya prosesinin başlaması üçün tərəflərdən biri digərinə mediasiya təklifi göndərməli, yaxud tərəflər arasında mediasiya prosesinin tətbiqi barədə müqavilə bağlana bilər. Mediasiya təklifinin göndərilməsi ilə iddia müddətinin axımı dayandırılır. Mediasiya prosesinin müddəti 30 gündür, lakin tərəflərin razılığı ilə bu müddət daha 30 günə qədər uzadıla bilər. Mediasiya prosesində bir və ya bir neçə iclas keçirilə bilər. Mediasiya prosesinin sonunda tərəflər razılığa gələrək barışıq sazişi bağlaya bilər, belə razılıq olmadıqda mediasiya prosesinə xitam verilməsi haqqında protokol tərtib oluna, mediasiya prosesini davam etdirməyə razılıq olmadıqda “İlkin mediasiya sessiyasından sonra prosesin davam etdirilə bilməməsi” barədə arayış tərtib oluna, yaxud tərəflər və ya onlardan biri mediasiya sessiyasında iştirak etmədikdə və ya iştirak etməkdən yazılı şəkildə imtina etdikdə, yaxud “mediasiya prosesinin tətbiqi barədə müqavilə”ni imzalamağa razı olmadıqda, mediator sessiyada iştirak edən və etməyən tərəfləri qeyd etməklə “Mediasiya sessiyasında iştirak edilməməsi” ilə bağlı arayış tərtib edilərək iştirak edən tərəfə verilir.

Hər hansı sualınız yaranarsa, bizimlə əlaqə saxlaya bilərsiniz.