Korporativ xidmətlər

Hüquqi şəxsin ləğvi onun mövcudluğuna və fəaliyyətinə hüquq və vəzifələri hüquq varisliyi qaydasında başqa şəxslərə keçmədən xitam verilməsi deməkdir. Hüquqi şəxsin ləğvi könüllü qaydada və ya məhkəmə qərarı ilə məcburi qaydada ola bilər. Hüquqi şəxs aşağıdakı hallarda ləğv edilə bilər:

1. onun təsisçilərinin (iştirakçılarının) və ya hüquqi şəxsin nizamnamə ilə vəkil edilmiş orqanının qərarı ilə, o cümlədən hüquqi şəxsin mövcudluğu üçün nəzərdə tutulan müddətin qurtarması və ya yaradılması zamanı qarşıya qoyulan məqsədin əldə edilməsi ilə əlaqədar olaraq;

2. hüquqi şəxsin yaradılması zamanı yol verilmiş qanunvericilik pozuntuları ilə əlaqədar onun qeydiyyatının məhkəmə tərəfindən etibarsız sayıldığı halda;

3. lazımi xüsusi icazə (lisenziya) olmadan fəaliyyət və ya qanunla qadağan edilmiş fəaliyyət həyata keçirildikdə və ya qanunvericilik digər şəkildə dəfələrlə və ya kobudcasına pozulduqda, habelə qanunvericilikdə nəzərdə tutulan başqa hallarda məhkəmənin qərarı ilə;

4. məhkəmənin yekun qərarı ilə hüquqi şəxsi ləğvetmə növündə cinayət-hüquqi tədbir tətbiq edildikdə;

5. Hüquqi şəxsin müflis olması nəticəsində məhkəmənin qərarı ilə;

6. MMC-nin və QSC-nin iştirakçılarının sayı qanunvericiliklə müəyyənləşdirilmiş həddi (50-ni) keçməməlidir. Əks halda MMC bir il ərzində səhmdar cəmiyyətinə, QSC isə ASC-yə çevrilməli, bu müddət bitdikdən sonra isə, əgər onun iştirakçılarının sayı azaldılıb qanunla müəyyənləşdirilmiş həddə endirilməzsə, məhkəmə qaydasında ləğv edilməlidir.

Hüquqi şəxsin ləğvi haqqında qərarla ləğvetmə komissiyası (təsviyəçi, ləğvedici) təyin edilir. Hüquqi şəxsin ləğvi məhkəmənin qərarına əsasən həyata keçirilməli olduqda, hüquqi şəxsin ləğv edilməsi haqqında məhkəmənin qərarı ilə onun təsisçilərinə (iştirakçılarına) və ya hüquqi şəxsin nizamnaməsi ilə onun ləğvi üçün vəkil edilmiş orqana hüquqi şəxsin ləğvini həyata keçirmək vəzifələri həvalə edilə bilər. Məhkəmənin yekun qərarı ilə hüquqi şəxsi ləğvetmə növündə cinayət-hüquqi tədbir tətbiq edildikdə, ləğvetmə komissiyasına (təsviyəçiyə) hüquqi şəxsin ləğvini həyata keçirmək vəzifələri həvalə olunur.

Hüquqi şəxsin ləğvi bu barədə qeydin hüquqi şəxslərin dövlət reyestrinə daxil edildiyi andan başa çatmış, hüquqi şəxs isə mövcudluğuna son qoymuş sayılır.

Şirkətin ləğvi üçün bütün prosedurların qanunvericiliyə uyğun icra edilməsi üçün bu sahədə ixtisaslaşmış peşəkar hüquqşünaslarımızın xidmətlərindən yararlana bilərsiniz.

Qeyd edilən xidmət haqqına dövlət rüsumları və digər rəsmi xərclər daxil deyildir. Hər hansı sualınız yaranarsa, bizimlə əlaqə saxlaya bilərsiniz.